الحلقة الثالثة

  بعد مارجعنا من شهر العسل كنت مهموم بسبب كيف راح اتعامل مع هذا الكائن الذي يغضب وينفجر لأتفه سبب

دخلت بيت اهلي بعد الوصول من السفر وسلمت على امي وابي ... لاحظت امي على وجهي علامات الهم والحزن وهذا ما اخبرتني به لاحقاً ...

 كان والدي في يوم وصولي قد وضع لي وليمة عشاء وتم دعوة اهلها لحضور هذه الوليمة ... تعشينا وانبسطنا وكانت زوجتي  اتفقت معي للمبيت في بيت اهلها لمدة 3 ايام لأن اهلها يسكنون في مدينة تبعد عن الرياض 90 كيلو بحكم عمل والدها

 بعد ما مشت زوجتي مع اهلها اتصلت علي بالليل وقالت ليش ما ودعتني ؟؟؟ لاحول ولا قوة الا بالله

انا آسف نسيت ... كانت تبحث عن اي زلة للمعاتبة حتى تخيلت انها مخلوقة لكي تعاتب .

في ثاني يوم العصر اتصلت علي وقالت تعال خذني قلت ليش ؟ قالت ابوي يقول خلاص ارجعي لزوجك !! طيب اوكي اجيك الآن .

 في نهاية الاسبوع وكان يوم جمعة قالت لي بروح مع اهلي نتمشى قلت لها طيب الله معك ، ورحت عند اصدقائي الى الساعه 11 ليلاً ورجعت البيت لقيتها توها راجعه من مشوارها وزعلانة !!! وش فيك يافلانه زعلانه ؟ قالت ليش ما عطيتني فلوس لما رحت مع اهلي ؟ قلت ليش انتم وين ورحتوا قالت للسوق قلت كان قلتي لي من اول عشان اعطيك !
قالت المفروض بدون ما اقولك تعطيني وبعدين فيه اشياء كثيرة كان نفسي اشتريها
قلت لها مثل ايش ؟
قالت ملابس
قلت بس انا شريت لك ملابس كثير من ماليزيا
قالت حتى ولو ابي اشتري زيادة
قلت ان شاء الله يكون خير ....

 بعدها بيوم قلت لها وش رايك نروح نتقهوا المغرب مع اهلي قالت طيب

المهم نزلنا عند اهلي وتقهوينا وزوجتي كانت على الصامت وحسيت انه الجو ما اعجبها فسحبت نفسي واستاذنت ورجعنا للبيت !!! وكانت ما تكلمني

 وش فيك يافلانه ؟ وش اللي مزعلك ؟

 قالت امك ما سمعتها وش قالت ؟

 وش قالت امي ؟

 قالت تسألني عن الغدا اذا اعجبنا او لا ( كانت امي ترسل لنا الغداء يومياً بسبب اني تعيس عفواً عريس جديد )

طيب وين المشكلة يافلانة ؟

 امك قصدها انه خلاص اطبخي انتي ماراح ارسل لكم غدا مره ثانية !

قلت لها مو هذا قصد امي

 قالت انت تدافع عن امك ؟

 قلت لها ايه ادافع عنها لاني اعرفها

 المهم ان حرمي المصون زعلت ليلة كاملة ....

 في اليوم التالي اعتذرت لها وبصعوبة رضت

 قالت ابي اروح كافيه

 قلت لها طيب

 ورحنا كافيه وتقهوينا

 قالت لي متى اهلك راح يحطون لي عزيمة ؟

 قلت والله ما ادري

 قالت يعني امك ما قالت لك شي ؟

 قلت لا

 قالت واضح انهم ما ودهم يحطون لي عزيمة ولا حفلة

 قلت بس حنا سوينا عرس كبير واعتقد انه يكفي ....

 قالت انتم ما تشوفون الناس كيف يتعاملون مع زوجات عيالهم ؟

 يسوون لهم حفلات وعزايم

 قلت لها ابوي حط عشاء لأهلك اول ما رجعنا من السفر !!!

قالت ما يكفي ابي حفلة كبيرة ...

 اخذت نفس عميق وتمنيت الزمن يرجع شوي واعيش عزوبي مرتاح البال

الى اللقاء في الحلقة الرابعة 

الحلقة الثانية

الحلقة الثانية 


- سافرنا لشهر العسل في ماليزيا ومن المواقف اللي ما انساها وبينت لي شخصية زوجتي 

تغدينا في مطعم قريب من الفندق وبعد ماخلصنا قلت لها خلينا نروح للغرفة الي اخذ شور ونطلع قالت لا بنروح كافي قلت شوي ونطلع فجأة زعلت وبرطمت طبعاً انا مادريت الا بعد ماطلعنا من الغرفة لاحظت انها ساكتة قلت لها وش فيك ؟؟ قالت ليش ترفض طلبي ؟؟؟؟

قلت لها اي طلب ؟ قالت ليش مارحنا كافي على طول قلت اخذت شور وطلعنا قالت من اولها ما تسمع كلامي هذا غلاي عندك ؟ قلت لها الموضوع بسيط ما يستاهل هالزعل قالت الأشياء الصغيرة هذي وما لبيتها لي يعني ماراح تلبي لي الاشيا الاكبر قلت في نفسي هذي اولها زعل ونكد حسبنا الله ونعم الوكيل . 

- مرة في احد مدن ماليزيا وكنا راح نسافر بكره لمدينة ثانية فقلت لها ابي انزل للرسبشن احجز سيارة بكره توصلنا للمطار سكتت وما علقت المهم اني نزلت وحجزت سيارة توصلنا للمطار لما رجعت للغرفة لقيتها زعلانة !!!! وش فيك يافلانة ؟ وبعد محاولات لمدة ساعة قالت لي ليش نزلت وتركتني لحالي !!!!! قلت لها بس خمس دقايق ورجعت قالت ولو راح تكون عادة لك بروح مشوار اخلص وتتركني !!!!! حسبنا الله ونعم الوكيل 


- مرة كنا جالسين في كافي في كوالالمبور قالت لي انت سبق خطبت غيري استغربت من السؤال في هذا الوقت المبكر قلت لها كان فيه كلام بس لكن خطبة لا 

قالت انا سبق خطبني ولد خالتي وكان يموت فيني تصدق انه لما كنت اجي عند خوالي يسأل عني ويقول اذا فلانه تبي مشوار تراني موجود اذا تبون سوق او امشيكم انا حاضر صم ضحكت ضحكه ما ادري هي ضحكة غباء او قلة حياء ... تكمل زوجتي وتقول تصدق انه انهبل لما خطبتني وخالتي اتصلت على امي وقالت لها اذا البنت تطلقت ترى ولدي يبيها تكمل وتقول تصدق انه يموت فيني فوق ما تتصور تجرأت وسألتها ليش ما وافقتي عليه ؟؟ قالت ودي اغير !!!

صدمت كثيرا من كلامها جريء لحد الغباء قلت في نفسي الظاهر راح اعاني من الزواج كثيراً

- دخلنا احد الاسواق نتمشى ودخلنا احد محلات الماركات المعروفة للشنط المهم سألت زوجتي البائع بكم هذي الشنطة ؟؟ قال 8000 تقريباً بالريال قالت وش رايك آخذها ؟ قلت لها شنطتك جديدة وماركة وما يحتاج تشترينها ! قالت مو انا اللي راح اشتريها انت راح تشتريها لي هدية 

قلت لها تستاهلين بس راح ترهقين ميزانيتي كذا وطلعت من المحل زعلانة وما رضت حتى اشتريت لها جوال آيفون 3 


تخيلوا كل هذه الاحداث في اول اسبوعين من الزواج 

الله يستر من الجاي 

الحلقة الاولى

الحلقة الأولى 

مرحباً بكم جميعاً واشكركم على تشجيعي لكتابة بعض مذكراتي 

- عندما وصل عمري 30 قررت الزواج بعد ما كونت نفسي مالياً فأنا اعمل في احد الشركات الكبرى براتب جيد جداً ، ولرغبة اهلي ان لا ابعد عنهم قررت السكن في شقة فوق اهلي وتعتبر شقة كبيرة 


بعد البحث في اقاربنا و معارفنا لم اجد فيهم من يرتاح لها قلبي وهذا اكبر خطأ وقعت فيه 

وفي غمرة البحث اتصلت احدى قريباتي لتبلغ والدتي عن وجود فتاة جميلة نسبياً عمرها 25 وجامعية .

اتصلت امي على اهلها وقالوا ان البنت شبه مخطوبه 

بعد شهر اتصلت ام البنت وقالت لامي ان كان ودكم تشوفون البنت حياكم الله 

المهم رحنا نزورهم واشوف البنت الشوفه الشرعية 

شفتها واقتنعت بها وعلى بركة الله .... الخطأ العظيم اني لم أسأل عن البنت 


تم كتابة عقد النكاح وجلست معها وكانت صامتة تماماً ولبستها الشبكة 

اسولف معها وهي منزله راسها للأرض ، جلست معها تقريباً ساعه ونص ولم تنطق بحرف واحد ، حسيت نفسي ثقيل وقلت اكيد البنت مستحيه استأذنت وطلعت 

في اليوم الثاني اتصلت عليها من العصر الى العشاء وما ردت علي الا بالليل 

سلمت عليها وحاولت اخليها تتكلم شوي لكن بلا فائدة 

واستمرت المكالمات بشكل اسبوعي وما تتعدى دقائق معدودة كنت انا المتحدث الرئيسي فيها 

حقيقة ماكنت متشجع على مكالمتها لاني احسيت المكالمة ثقيلة على قلبها 

انهيت تجهيز البيت من كل شي وكذلك شهر العسل في ماليزيا لمدة 18 يوم 

جاء يوم الزواج وتزوجنا ورحنا للفندق في الرياض استعداداً للسفر غداً 

اول مادخلنا الغرفة في الفندق قالت لي عطني جوالك ... قلت يمكن تبي تتصل على اهلها او شي قلت لها تفضلي وكتبت فيه خلني في حالي حتى اكون متهيأه نفسياً 

تفاجأت من الطلب لكن وافقتها 

وتعشينا بالفندق وانا اسولف لين تعبت وهي ما اكلت شي 

جاء وقت النوم وقالت لي ما ابيك تنام معي !!!! قلت لها انتي زوجتي وماراح اضرك او اؤذيك 

المهم اصرت وقالت انت نام بالغرفة وانا على الكنبه بغرفة الجلوس (انا اخذت جناح بالفندق غرفة نوم وغرفة جلوس ) 

حاولت معها مو معقول ليلة زواجي يصير كذا ، قالت والله ماتنام جنبي 

والا بروح لاهلي

وافقت وقلت انتي نامي بغرفة النوم وانا على الكنبة بغرفة الجلوس 

اول ما دخلت غرفة النوم قفلت الباب ونامت وانا نمت على الكنبة  

للحلقة بقية انتظروني ....