بعد مارجعنا من شهر العسل كنت مهموم بسبب كيف راح اتعامل مع هذا الكائن الذي يغضب وينفجر لأتفه سبب
دخلت بيت اهلي بعد الوصول من السفر وسلمت على امي وابي ... لاحظت امي على وجهي علامات الهم والحزن وهذا ما اخبرتني به لاحقاً ...
كان والدي في يوم وصولي قد وضع لي وليمة عشاء وتم دعوة اهلها لحضور هذه الوليمة ... تعشينا وانبسطنا وكانت زوجتي اتفقت معي للمبيت في بيت اهلها لمدة 3 ايام لأن اهلها يسكنون في مدينة تبعد عن الرياض 90 كيلو بحكم عمل والدها
بعد ما مشت زوجتي مع اهلها اتصلت علي بالليل وقالت ليش ما ودعتني ؟؟؟ لاحول ولا قوة الا بالله
انا آسف نسيت ... كانت تبحث عن اي زلة للمعاتبة حتى تخيلت انها مخلوقة لكي تعاتب .
في ثاني يوم العصر اتصلت علي وقالت تعال خذني قلت ليش ؟ قالت ابوي يقول خلاص ارجعي لزوجك !! طيب اوكي اجيك الآن .
في نهاية الاسبوع وكان يوم جمعة قالت لي بروح مع اهلي نتمشى قلت لها طيب الله معك ، ورحت عند اصدقائي الى الساعه 11 ليلاً ورجعت البيت لقيتها توها راجعه من مشوارها وزعلانة !!! وش فيك يافلانه زعلانه ؟ قالت ليش ما عطيتني فلوس لما رحت مع اهلي ؟ قلت ليش انتم وين ورحتوا قالت للسوق قلت كان قلتي لي من اول عشان اعطيك !
قالت المفروض بدون ما اقولك تعطيني وبعدين فيه اشياء كثيرة كان نفسي اشتريها
قلت لها مثل ايش ؟
قالت ملابس
قلت بس انا شريت لك ملابس كثير من ماليزيا
قالت حتى ولو ابي اشتري زيادة
قلت ان شاء الله يكون خير ....
بعدها بيوم قلت لها وش رايك نروح نتقهوا المغرب مع اهلي قالت طيب
المهم نزلنا عند اهلي وتقهوينا وزوجتي كانت على الصامت وحسيت انه الجو ما اعجبها فسحبت نفسي واستاذنت ورجعنا للبيت !!! وكانت ما تكلمني
وش فيك يافلانه ؟ وش اللي مزعلك ؟
قالت امك ما سمعتها وش قالت ؟
وش قالت امي ؟
قالت تسألني عن الغدا اذا اعجبنا او لا ( كانت امي ترسل لنا الغداء يومياً بسبب اني تعيس عفواً عريس جديد )
طيب وين المشكلة يافلانة ؟
امك قصدها انه خلاص اطبخي انتي ماراح ارسل لكم غدا مره ثانية !
قلت لها مو هذا قصد امي
قالت انت تدافع عن امك ؟
قلت لها ايه ادافع عنها لاني اعرفها
المهم ان حرمي المصون زعلت ليلة كاملة ....
في اليوم التالي اعتذرت لها وبصعوبة رضت
قالت ابي اروح كافيه
قلت لها طيب
ورحنا كافيه وتقهوينا
قالت لي متى اهلك راح يحطون لي عزيمة ؟
قلت والله ما ادري
قالت يعني امك ما قالت لك شي ؟
قلت لا
قالت واضح انهم ما ودهم يحطون لي عزيمة ولا حفلة
قلت بس حنا سوينا عرس كبير واعتقد انه يكفي ....
قالت انتم ما تشوفون الناس كيف يتعاملون مع زوجات عيالهم ؟
يسوون لهم حفلات وعزايم
قلت لها ابوي حط عشاء لأهلك اول ما رجعنا من السفر !!!
قالت ما يكفي ابي حفلة كبيرة ...
اخذت نفس عميق وتمنيت الزمن يرجع شوي واعيش عزوبي مرتاح البال
الى اللقاء في الحلقة الرابعة
ليست هناك تعليقات:
إرسال تعليق